A presidenta do COE Ourense, Ascensión Pérez Sampayo, (a terceira pola esquerda) acompañada doutros asistentes ao foro-almorzo | FONTE: La Región (Xesús Fariñas).
Ourense, 31 de marzo de 2023. A presidenta da Organización Colexial de Enfermería de Ourense, Ascensión Pérez Sampayo, accedeu onte á invitación recibida para asistir ao almorzo organizado polo Foro La Región no que interviu a portavoz nacional do BNG, Ana Pontón.
Neste encontro coa cidadanía, celebrado no Restaurante Gastrobar San Miguel e cuxa temática era “Retos de Galiza nun mundo en transformación”, Pontón presentou o modelo municipal do BNG para Ourense. No evento tamén houbo espazo para o debate e para o contraste de ideas cos presentes.
Ana Pontón resaltou a importancia do reforzo dos servizos públicos, poñendo especialmente o foco no eido sanitario. Por iso, fixo fincapé na cuestión relativa á atención primaria, un servizo que, segundo apuntou, “sufriu recortes por máis de 2.000 millóns de euros nos últimos 14 anos”.
Por este motivo, a líder nacionalista propón un novo modelo que dedique o 25% do orzamento da Consellería de Sanidade a atención primaria. Asi mesmo, tamén denunciou a precariedade e a necesidade de por fin á falta de persoal, así como de crear novas especialidades coma, por exemplo, a psicoloxía clínica, co fin de garantir que “todo o mundo poida ter acceso á saúde mental independentemente dos seus recursos”.